УНИВЕРСИТЕТИМИЗДИҢ ФУТБОЛ КОМАНДАСЫ ҚАРАҚАЛПАҚСТАН ЧЕМПИОНЫ

   

 

    Усы жылдың 30-октябрь сәнесинен 17-ноябрь сәнесине шекем пайтахтымыздағы орайлық «Туран» стадионында футбол бойынша Қарақалпақстан чемпионаты өткерилди.

 

  Чемпионатқа Қарақалпақ Мәмлекетлик университетиниң «ҚМУ», Нөкис Мәмлекетлик педагогикалық институтының «НМПИ», Хожели районынан «Водник» ҳәм Нөкис спорт колледжиниң оқытыўшы-тренерлеринен ибарат «НСК-1» және  колледж оқыўшыларынан дүзилген «НСК-2» командалары қатнасты. Беллесиўлер жоқары шөлкемлестириўшилик дәрежесинде өтти. 17-ноябрь күни чемпионатта ең көп упай топлаған «ҚМУ» ҳәм «НМПИ» командалары өз-ара финал беллесиўинде қатнасты.

   - Дәслепки ойында «НМПИ» командасына 2:3 есабында уттырып қойған едик. Бирақ, кейинги ойынларға оғада пуқта таярлықлар менен қатнасып, исенимли түрде жеңислерди қолға киргиздик. Финал ойынына шекем командамыз есабында 7 ойыннан соң 22 упай, ал қарсыласымыз «НМПИ» командасында 25 упай бар еди. Бирақ, бизлерде қарсыласлар дәрўазасына өткерилген ҳәм өзлеримизге өткерилип жиберилген топлар салыстырмасы жоқары еди. Майданға тек жеңис ушын түстик ҳәм нәтийжеде 1:0 есабында жеңиске еристик. Чемпионлыққа ерисиў аңсат болмады. Университетимиз ректоры М.Жуманов беллесиўлерге пуқта таярлықлар көриўимиз ушын барлық шәраятларды жаратып берди. Сондай-ақ, университет спорт клубы менен кәсиплик аўқамы да қәўендерлик жәрдемин көрсетти, - дейди «ҚМУ» командасының ойыншы-тренери Т.Сейтмуратов.

  Чемпионат жуўмағына муўапық, «НМПИ» командасы менен бирдей упай топлаған, бирақ, қарсыласларына қарағанда дәрўазаға көбирек топ жоллай алған университетимиздиң «ҚМУ» командасы биринши, «НМПИ» командасы екинши ҳәм «НСК-1» командасы үшинши орынды ийеледи.

    Университетимиз сайланды командасының ағзасы, беллесиўлер даўамында қарсылас командалардың дәрўазасына 11 топ жоллай алған, дене мәденияты факультетиниң студенти С.Меңлимуратов «Ең көп гол урған футболшы» номинациясы бойынша жеңимпаз деп табылды. Команданы жарысқа белгили спорт устасы, тренер М.Н.Солохин таярлады.

Ислам МАТЕКОВ,

Журналистика бағдарының 4-курс студенти