Техника факультети деканы:

Узаков Торебек Джумабаевич

+99861-226-12-26
t_uzaqov@karsu.uz
http://texnika.karsu.uz/

 

 

 

Факультеттеги кафедралар:

  1. Имаратлар ҳәм  сооружениелер қурылысы кафедрасы
  2. Архитектура ҳәм қала қурылысы кафедрасы
  3. Инженерлик коммуникациялар қурылысы кафедрасы

Техника факультети тарийхы

Техника факультети Қарақалпақ мәмлекетлик университети қурамындағы ең ири факультетлерден есапланады. ХХ әсирдиң 90-жылларына келип дүнья жүзиндеги ири мәмлекетлерде илим ҳәм техниканың раўажланыўы, Қарақалпақстанда да жоқары қәнигели инженер-қурылысшыларға талаптың оғада артыўына алып келди. Сол себепли 1990-жылы Нөкис қурылыс техникумы имаратында Ташкент политехника институтының Нөкис филиалы ашылды ҳәм жергиликли студентлер дәслепки еки курсты усы факультетте ал жоқарғы еки курсты Ташкент қаласында оқытыў шөлкемлестирилди. Бул жыллары «Санаат ҳәм пуқаралық қурылысы», «Суў тәмийнаты, канализация, суў ресурсларынан рациональ пайдаланыў ҳәм қорғаў», «Электр энергетикасы» қәнигеликлери бойынша студентлер оқыўға қабыл етилди. Бул факультетти шөлкемлестириўде Нөкис қурылыс колледжи жәмәәтинин үлкен үлесин ҳәм таярлық жумысларын, атап айтқанда колледж директоры Т.Атамуратовтың пидәкерлик мийнети уллы болды, кейиншелли   қоса ислеў тийкарында факультеттиң биринши деканы етип белгиленди. Факультетте бир кафедра «Улыўма техникалық пәнлер» кафедрасы қурамы 7 профессор-оқытыўшыдан ибарат болып оның үшеўи илим кандидатлары еди, бул кафедраны ф-м.и.к. Д.Утебаев басқарды. 1991-жылы Ташкент политехника институты қурамындағы архитектура-қурылыс бағдарындағы үш факультет бөлинип Ташкент архитектура-қурылыс институты (ТАҚИ) сыпатында шөлкемлестирилип оның қурамында Нөкис улыўма техника факультети қосылып факультет деканы болып Ж.Атаниязов тастыйықланды. 1992-жылы факультетте және бир кафедра ашылып ол «Улыўма инжинерлик пәнлер» кафедрасы атамасы берилди ҳәм кафедра баслығы етип т.и.к. К.Байманов сайланды. 1993-жылы Нөкис улыўма техникалық факультети негизинде ТАҚИ Нөкис филиалы шөлкемлестирилди ҳәм студентлердиң оқыўы толығы менен Нөкис қаласында тамамланатуғын болды. Филиалдың шөлкемлестирилиўинде факультет деканы э.и.к. Ж.Атаниязовтың ҳәм кафедра баслықлары т.и.к.К.И.Байманов, ф-м.и.к. Д.Утебаевлар, оқыў ислери бойынша декан орынбасары Р.Ешниязовлардың хызметлери айрықша болды. 1995-жылы ТАҚИ Нөкис филиалы Қарақалпақ мәмлекетлик университети қурамына «Инженерлик қурылыс» атамасы менен өткерилди. Бул факультет курамында «Қурылыс» ҳәм «Суў тәмийнаты ҳәм канализация» кафедралары ислеп турды. 2005 жылы «Физика» ҳәм «Инженерлик қурылыс» факультетлери биригип «Физика-техника» факультети болып қайта шөлкемлестирилди ҳәм факультет деканы проф.Қ.Исмаилов жумыс иследи. 2009-жылы бул факультет екиге ажыратылды ҳәм «Техника» факультети деп аталды. 2010-жылы «Техника» факультети ҳәм «Химия» факультети менен бириктирилип «Химия-техника» факультети пайда етилди ҳәм факультет деканы болып доц. М.Айымбетов жумыс иследи. 2012-жылы факультетлер және ажыратылды ҳәм «Техника» факультети атамасы менен бүгинги күнге дейин усы атамада жумыс алып бармақта.

Бул дәўирлер ишинде факультетти Х.Абдуллаев, Б.Абдикамалов, Д.Жумамуратов, М.Тагаев, Қ.Даўлетов, Б.Даулетмуратовлар басқарды. Ҳәзирги ўақытта факультетти техника илимлериниң кандидаты Төребек Узақов басқарып келмекте.

Ҳәзирги күнде факультетте 6 бакалавр бағдарлары бойынша жәми 1522 студент тәлим алмақта. «Имаратлар ҳәм сооружениелер қурылысы», «Архитектура ҳәм қала қурылысы» ҳәм «Инженерлик коммуникациялар қурылысы» кафедралары жумыс ислеп тур.

Бакалавр бағдарлары:

  1. 5340100 – Архитектура
  2. 5340200 – Имарат ҳәм сооружениелер қурылысы
  3. 5340300 – Қала қурылысы ҳәм хожалығы
  4. 5340400 – Инженерлик коммуникациялар қурылысы ҳәм монтаж
  5. 5340500 – Қурылыс материаллары, буйымлары ҳәм конструкцияларын ислеп шығарыў
  6. 5340800 – Автомобиль жоллары ҳәм аэродромлар

Профессор-оқытыўшылар қурамы: 63

Илим докторлары: 1.

Илим кандидаты: 9