Көкте қуяш қалсын жерде жақсылық

Өмирдеги мениң мақсет мурадым:

Қуўып шығыў қайда болса пәс қылық.

Дүньяда не қалсын десе, жуўабым,

Көкте қуяш қалсын жерде жақсылық.

(Төлепберген Мәтмуратов)

Бүгин Нөкис қалалық 33-санлы улыўма орта билим бериў мектебинде ҚМУ қарақалпақ филологиясы факультети әмелиятшы студентлери ҳәм усы мектептиң қарақалпақ тили ҳәм әдебияты пәни бойынша метод бирлеспеси тәрепинен Бердақ атындағы мәмлекетлик сыйлықтың лауреаты, шайыр Төлепберген Мәтмуратовтың 80 жыллық юбилейине арналған “Көкте қуяш қалсын, жерде жақсылық” атамасында адебий кеше шөлкемлестирилди.

Илажды мектеп директоры – Салтанат Иниятова кирис сөз бенен ашып берди.

Әмелиятшы – Зийўар Орынбаева “Т.Мәтмуратов лирикасы” атамасында илимий баянат жасады. Кеше мийманлары Қарақалпақ әдебияты кафедрасы баслығы, филология илимлериниң кандидаты Абадан Досымбетова, Педогогика ҳәм психология кафедрасы үлкен оқытыўшысы Гүлбахар Оразбаевалар шайырдың қосықлары ҳаққында айтып, байрам кешесине өзлериниң унамлы  пикирлерин билдирди.

Әдебий кешеде шайырдың «Жақсы адамның жүреги» драмалық поэмасына арнап сахналық көринис шөлкемлестирилди. Сондай-ақ, мектептеги талантлы оқыўшылар намалы қосықларды атқарды. Илаж жуўмағында мектеп жәмәәти әмелиятшыларға миннетдаршылығын билдирди.

Санобар Акимбаева,

ҚМУ Журналистика тәлим бағдары 3-курс студенти.

 

admin